Kryetari Murati takon përfaqësuesit e Iniciativës qytetare “Lugina do zgjidhje”
18.07.2018 · Lëvizja për Bashkim
Sot, kryetari i Lëvizjes për Bashkim, z. Valon Murati, me bashkëpunëtorë, priti në një takim pune udhëheqësit e fushatës “Lugina do Zgjidhje”, me të cilët u diskutoi për rezultatet e deritanishme të fushatës si dhe për platformën e Lëvizjes për Bashkim lidhur me bisedimet me Serbinë, ku përfshihet reciprociteti në mes të tri komunave në veriun e Kosovës: Zveçan, Zubin Potok e Leposaviq dhe tri komunave të Kosovës Lindore: Preshevë, Medvegjë e Bujanoc.
Në këtë takim kryetari Murati shprehu shqetësimin e Lëvizjes për Bashkim për mungesën e platformës së institucioneve të vendit, e rrjedhimisht, mospërfshirjen e problemit të Kosovës Lindore në bisedimet e tyre me Serbinë. Gjithashtu, ishte qëndrim i përbashkët se e vetmja zgjidhje afatgjate për problemin shqiptaro-serb mund të jetë ajo që arrihet mbi parimin e reciprocitetit.
Kryetari Murati shprehu edhe një herë mbështetjen e pa rezervë të Lëvizjes për Bashkim për Fushatën “Lugina do Zgjidhje” dhe e përshëndeti deklaratën e përfaqësuesve të komunave Preshevë, Medvegjë dhe Bujanoc.
Palët u pajtuan që ta vazhdojnë bashkëpunimin në funksion të përfshirjes së çështjes së Kosovës Lindore në agjendën e bisedimeve dhe përfshirjen e sa më shumë akterëve politik por edhe të shoqërisë civile dhe medias në këtë çështje.
Lëvizja për Bashkim
Prishtinë, 18.7.2018