1. Home
2. Informacione
3. Media
4. LB i bën thirrje Qeverisë që ta formojë një ekip negociator gjithpërfshirës për bisedime

LB i bën thirrje Qeverisë që ta formojë një ekip negociator gjithpërfshirës për bisedime

21.09.2010 ·

Duke e pasur parasysh gjendjen e krijuar pas Rezolutës së Asamblesë së Përgjithshme të OKB-së në lidhje me bisedimet Kosovë-Serbi;

Duke e pasur parasysh rëndësinë e madhe të bisedimeve Kosovë-Serbi për marrëdhëniet e ardhshme shqiptaro-serbe;

Këshilli i Përgjithshëm i Lëvizjes për Bashkim konkludon se:

• Qeveria e Kosovës nuk duhet të sillet indiferente ndaj situatës dhe të qëndrojë në pozita pritëse. Ajo duhet të angazhohet me të gjithë mekanizmat e saj për të ndikuar në përcaktimin e agjendës së këtyre bisedimeve dhe t’i bëjë të gjitha përgatitjet e nevojshme për to;
• Pala shqiptare e Kosovës duhet të këmbëngulë që në bisedimet me Serbinë të shtrohen çështjet me rëndësi fundamentale për marrëdhëniet midis dy shteteve. Çdo bisedim në mes të Kosovës dhe Serbisë që e ka në qendër të vëmendjes veriun e Kosovës (Leposaviq, Zveqan e Zubin Potok), e që nuk e ka Kosovën Lindore (Preshevë, Bujanoc e Medvegjë) do të ketë pasoja të rënda për Kosovën dhe popullin shqiptar;
• Kosova nuk duhet të pranojë me asnjë kusht që në bisedime me Serbinë të trajtohet çështja e veriut të Mitrovicës, aq më pak të trajtohet në një pako me pjesën e territorit të banuar me shumicë serbe në veri. Sepse ky do të ishte legjitimim i ndryshimit të strukturës etnike me anën e spastrimit etnik, i cili u krye pas përfundimit të luftës me bekimin e ndërkombëtarëve. Para çdo bisedimi për veriun e Mitrovicës e për statusin e tij duhet që pronarët e dëbuar shqiptarë të kthehen në pronat e veta dhe të krijohet siguri reale për ta;
• Në bisedimet e mundshme me Serbinë Kosova do të duhej të përfaqësohej nga një ekip gjithëpërfshirës negociator i cili do të pajtohej rreth një strategjie për zgjidhjen përfundimtare të çështjes shqiptaro-serbe.

Prandaj, Lëvizja për Bashkim kërkon nga institucionet e Kosovës që të ngulin këmbë që agjenda e bisedimeve ta ketë vetëm një pikë: zgjidhjen përfundimtare të çështjes shqiptaro-serbe.

Gjithashtu, Lëvizja për Bashkim i bën thirrje Qeverisë së Kosovës që ta formojë një ekip negociator gjithpërfshirës i cili edhe do t’a ndërtonte strategjinë për këto bisedime.